Leviticus 19

1¶ Na BIKPELA i toktok long Moses na tok, 2Toktok long olgeta bilong dispela bung bilong ol pikinini bilong Isrel na tok olsem long ol, Yupela mas i stap holi. Long wanem Mi BIKPELA na God bilong yupela, Mi stap holi. 3Yupela olgeta man wan wan i mas pret long mama bilong em na papa bilong em na holimpas long ol sabat bilong Mi. Mi stap BIKPELA na God bilong yupela. 4Yupela i no ken tanim yupela yet i go long ol god giaman, o mekim gol samting i kuk bilong wokim ol god long yupela yet. Mi stap BIKPELA na God bilong yupela. 5Na sapos yupela i ofaim wanpela sakrifais i bilong ol ofa bilong givim bel isi i go long BIKPELA, yupela mas ofaim dispela long laik bilong yupela yet. 6Yupela mas kaikai dispela long de yupela i ofaim dispela na long de bihain. Na sapos sampela i stap yet inap long de namba tri, yupela mas kukim dispela olgeta long paia. 7Na sapos yupela i kaikai wanpela samting bilong dispela long de namba tri, dispela pasin i sting tru long ai bilong Mi. Bai Mi no orait long dispela. 8Olsem na olgeta wan wan i kaikai dispela, em i mas karim sin nogut bilong em, long wanem em i bin mekim i kamap doti dispela samting holi bilong BIKPELA. Na yupela i mas bagarapim bilong rausim dispela tewel long namel long ol manmeri bilong em. 9Na taim yupela i kamautim kaikai bilong graun bilong yupela, yu no ken kamautim olgeta samting i stap long ol kona bilong gaden bilong yu. Na tu yu no ken kisim ol las liklik hap kaikai i stap yet bilong ol kaikai yu bin bungim. 10Na yu no ken kisim ol liklik hap kaikai bilong ol diwai wain bilong yu, na tu yu no ken bungim olgeta pikinini bilong diwai wain bilong yu. yu mas larim ol i stap yet bilong ol rabis manmeri na ol man bilong narapela ples i ken kisim. Mi stap BIKPELA na God bilong yupela. 11¶ Yupela i no ken stil o trikim narapela o wanpela i tok giaman long narapela. 12Na yupela i no ken tok tru antap long nem bilong Mi na giaman. Na tu yu no ken mekim nem bilong God bilong yu i kamap doti. Mi stap BIKPELA. 13Yu no ken sitim man i stap klostu long yu, na tu yu no ken stilim samting bilong em. Pe bilong man yu baim long mekim wok i no ken stap wantaim yu olgeta hap bilong nait inap long moningtaim. 14Yu no ken tok long daunim wanpela iapas o putim wanpela samting bilong sutim lek long pes bilong wanpela aipas, tasol yu mas pret long God bilong yu. Mi stap BIKPELA. 15Yupela i no ken mekim pasin i no stretpela long makim pe bilong kot. Yu no ken litimapim man i no gat planti samting o givim biknem long bikpela man, tasol yu mas jasim man i stap klostu long yu long stretpela pasin. 16Yu no ken go nabaut olsem wanpela man bilong karim tok win namel long ol manmeri bilong yu. Na tu yu no ken sanap birua long blut bilong man i stap klostu long yu. Mi stap BIKPELA. 17Yu no ken i no laikim tru brata bilong yu long bel bilong yu. Yu mas hatim man i stap klostu long yu long wanpela samting i no stret, na yu no ken larim sin i stap long em. 18Yu no ken bekim pe nogut o karim bel nogut i birua long ol pikinini bilong manmeri bilong yu, tasol yu mas laikim tru man i stap klostu long yu olsem yu laikim yu yet. Mi stap BIKPELA. 19¶ Yupela mas holimpas long ol lo bilong Mi i stap long buk. Yu no ken larim ol bulmakau samting bilong yu i givim bel long narapela kain bulmakau samting. Yu no ken tromoi kain kain pikinini kaikai long gaden bilong yu. Na tu yu no ken putim long yu wanpela klos i abusim naispela waitpela rop na ol gras bilong sipsip. 20Na wanem man i pilai wantaim wanpela meri i stap wokmeri nating na ol i makim em long maritim wanpela man na i no gat wanpela i bin baim bek em o mekim em i kamap fri, ol i mas wipim dispela meri. Ol i no ken kilim i dai tupela, long wanem meri i no stap fri. 21Na dispela man i mas bringim ofa bilong pasin bilong sakim lo i bilong em i kam long BIKPELA long dua bilong haus sel holi bilong bung bilong ol manmeri, em wanpela sipsip man bilong i stap ofa bilong pasin bilong sakim lo. 22Na pris i mas mekim ofa bilong karamapim long mekim i kamap wanbel i bilong em long dispela sipsip man bilong ofa bilong pasin bilong sakim lo long pes bilong BIKPELA, bilong sin bilong em, em i bin mekim dispela. Na dispela sin em i bin mekim BIKPELA bai pogivim em long dispela. 23Na taim yupela bai kam insait long dispela hap graun na yupela bin planim olgeta kain diwai bilong kisim kaikai, orait yupela mas tingim ol kaikai i kamap long ol dispela diwai i no klin olsem man i no bin katim skin bilong bihainim kontrak wantaim God. Tripela yia dispela mas i stap olsem man i no bin katim skin long yupela. Yupela no ken kaikai ol dispela. 24Tasol long yia namba foa olgeta kaikai bilong ol dispela diwai mas i stap holi long litimapim nem bilong BIKPELA long dispela. 25Na long yia namba faiv yupela mas kaikai sampela bilong kaikai bilong ol, bai em i ken givim long yupela ol kaikai i kamap moa yet bilong em. Mi stap BIKPELA na God bilong yupela. 26Yupela i no ken kaikai wanpela samting wantaim blut. Na tu yupela i no ken wokim poisin o mekim hait pasin sanguma. 27Yupela i no ken rausim gras long ol sait bilong ol het bilong yupela, na tu yu no ken bagarapim ol kona bilong mausgras bilong yu. 28Yupela i no ken mekim wanpela kat long skin bilong yupela bilong sori long ol daiman o mekim wanpela mak long skin bilong yupela. Mi stap BIKPELA. 29Yu no ken mekim pikinini meri bilong yu i kamap pamuk meri long mekim em i kamap rot meri, nogut dispela hap graun i pundaun long pasin pamuk na dispela hap graun i kamap pulap long ol pasin nogut. 30¶ Yupela mas lukautim gut ol sabat bilong Mi na givim biknem long ples holi bilong Mi. Mi stap BIKPELA. 31No ken tanim yupela yet i go long ol husat i glasman na tu no ken wok long painim ol man i wokim poisin long yupela i stap doti long ol. Mi stap BIKPELA na God bilong yupela. 32Yu mas sanap long pes bilong wanpela i gat waitpela gras na givim biknem long pes bilong lapun man na pret long God bilong yu. Mi stap BIKPELA. 33Na sapos wanpela man bilong narapela ples i stap waira wantaim yu long graun bilong yupela, yupela no ken givim hevi long em. 34Tasol man bilong narapela kantri i stap wantaim yupela, em i mas stap long yupela olsem wanpela mama i bin karim namel long yupela. Na yu mas laikim tru em olsem yu laikim yu yet. Long wanem yupela bin i stap man bilong narapela kantri long graun bilong Isip. Mi stap BIKPELA na God bilong yupela. 35Yupela no ken makim wanpela samting i no stretpela long makim pe bilong kot o long makim longpela o long makim hevi o long makim hamas. 36Yupela mas i gat stretpela samting bilong skelim na stretpela samting bilong makim hevi na stretpela samting bilong makim hamas plaua samting i stap na stretpela samting bilong makim hamas wel samting i stap. Mi stap BIKPELA na God bilong yupela na Mi bin bringim yupela long lusim graun bilong Isip. 37Olsem na yupela mas wok long bihainim olgeta lo bilong Mi i stap long buk na olgeta tok bilong Mi long pe bilong kot na na mekim ol. Mi stap BIKPELA.